Ако имате чувство дека комарците секогаш ве избираат токму вас, додека луѓето околу вас речиси и да немаат каснувања, тоа не е само впечаток. Научниците откриваат дека овие инсекти ги избираат своите жртви според низа биолошки сигнали што човечкото тело ги испушта во околината.
Меѓу најважните се јаглеродниот диоксид што го издишуваме, телесната температура и специфичниот мирис на кожата. Значи, комарците не ги привлекува некаква „слатка крв“, туку комбинацијата од сигнали што ја создава секој човек.
На кожата живеат бројни микроорганизми кои ги разградуваат масните киселини, јаглехидратите и протеините, при што се создаваат испарливи органски соединенија. Токму тие придонесуваат за уникатниот мирисен „потпис“ на секој човек и им помагаат на комарците да одлучат кого ќе нападнат.
Првиот сигнал што го забележуваат е јаглеродниот диоксид. Комарците можат да го регистрираат потенцијалниот домаќин од околу десет метри, а поголемото количество издишан јаглероден диоксид ги насочува кон човекот. Затоа возрасните обично се попривлечни од децата.
Потоа доаѓа телесната топлина. Луѓето со повисока телесна температура полесно го привлекуваат вниманието на комарците. Бремените жени, на пример, можат да бидат попривлечни поради промените во метаболизмот и телесната температура.
Физичката активност исто така може да ја зголеми привлечноста. По вежбање телото создава повеќе топлина, јаглероден диоксид и пот, која содржи и соединенија што комарците можат да ги детектираат.
Разликите меѓу луѓето понекогаш се огромни. Според истражувања, во група од четири лица е можно едно лице да привлече најголем дел од каснувањата.
А зошто кај некого каснувањето едвај се забележува, додека кај друг се појавува голем оток и силно чешање? Тоа зависи од реакцијата на имунолошкиот систем на протеините во плунката на комарецот.
Затоа, ако сте омилена мета на комарците, причината најверојатно е комбинацијата од мирисот на вашата кожа, количината на издишан јаглероден диоксид и топлината што ја испушта вашето тело.
