Социјалните мрежи сè почесто се соочуваат со обвинувања дека нивните алгоритми намерно го задржуваат вниманието на корисниците, создавајќи зависност и потенцијално зголемувајќи го ризикот од психолошки проблеми, особено кај младите.
Платформите како „Фејсбук“, „Јутјуб“ и „Тикток“ користат непрекинато прикажување содржини, препораки и известувања за да ги задржат корисниците пред екраните. Колку подолго корисниците остануваат активни, толку повеќе платформите заработуваат од реклами. „Мета“, сопственик на „Фејсбук“, минатата година остварила рекордни приходи од 196,2 милијарди долари од рекламирање.
Овој модел сега се соочува со сè поголем регулаторен и правен притисок. Во САД, 29 сојузни држави поднесоа тужба против „Мета“, обвинувајќи ја компанијата дека нејзините платформи се дизајнирани така што младите корисници да станат зависни. Компанијата се согласи на спогодба вредна до 18 милијарди долари, а со Тексас постигна одделна спогодба од една милијарда долари.
Воедно, „Мета“ се согласи на ограничувања за времето што малолетниците го поминуваат на платформите и на ноќни блокади.
Истражувањата покажуваат поврзаност меѓу прекумерното користење на социјалните мрежи кај тинејџерите и почеста појава на анксиозност, депресија и незадоволство од сопствениот изглед. Во 2025 година американските тинејџери во просек поминувале околу 90 минути дневно на „Тикток“.
Експертите предупредуваат дека законите тешко го следат брзиот развој на технологијата. Сè поголема поддршка добиваат предлозите за автоматски најстроги безбедносни поставки за малолетниците и поголема контрола од страна на родителите.
Како можна алтернатива се разгледуваат и модели без реклами, засновани на претплата. Истражување од 2024 година покажало дека значителен дел од возрасните и младите би биле подготвени да плаќаат за социјална мрежа со построги безбедносни стандарди.
Дополнителен предизвик е брзиот развој на вештачката интелигенција. Големите технолошки компании вложуваат огромни средства во оваа област, а податоците собрани преку социјалните мрежи можат да имаат значајна улога во развојот на новите системи.
Експертите предупредуваат дека практиките што ги направија социјалните мрежи толку моќни би можеле да се пренесат и во вештачката интелигенција, која има потенцијал уште посилно да влијае врз човечкото однесување и размислување.
