Ако барем еднаш сте патувале со авион, веројатно сте почувствувале непријатен притисок, затнатост или дури болка во ушите при полетување.
Иако ова чувство понекогаш може да биде многу непријатно, најчесто не станува збор за сериозен проблем.
Оваа појава е позната како баротраума на увото, односно „авионско уво“, а се јавува поради наглата промена на притисокот во кабината на авионот.
Во средното уво има воздух, а притисокот во него треба да се изедначи со притисокот од надворешната страна на увото. За тоа е задолжена Евстахиевата туба, која го поврзува средното уво со задниот дел од носот и грлото.
При полетување, авионот брзо се искачува, поради што се менува и притисокот во кабината. Ако Евстахиевата туба не се отвори доволно брзо, се создава разлика во притисокот од двете страни на тапанчето.
Како последица може да се јават чувство на полност во увото, затнатост, пригушен слух или болка. Сличен проблем може да се појави и при слетување, кога притисокот повторно брзо се менува.
Еден од наједноставните начини за ублажување на непријатноста е џвакањето. Затоа многу патници при полетување и слетување џвакаат гума за џвакање или јадат бонбони.
Помагаат и голтањето и зевањето, бидејќи овие движења овозможуваат отворање на Евстахиевата туба и изедначување на притисокот.
Проблемите со притисокот може да бидат поизразени ако патувате со авион додека сте настинати, имате затнат нос, инфекција на синусите или воспаление на увото. Во такви ситуации Евстахиевата туба може да биде отечена и потешко да го изедначува притисокот.
Поради тоа, експертите советуваат, кога е можно, да го одложите летот доколку имате сериозна настинка, инфекција на синусите или воспаление на увото.
Кај лицата кои често го имаат овој проблем може да помогнат и специјални чепчиња за уши наменети за изедначување на притисокот.
