„Додека беше жив, го потценуваа и исмеваа, а денес сите го нарекуваат наш“ – Далибор Шуки Димитриевски со емотивна објава потсетува на односот кон Тоше Проески и на неправдата што, според него, му била нанесена додека ја градеше својата кариера.
Во објавата, Димитриевски пишува за навредите и приказните што кружеле за пејачот во времето кога станувал сè попопуларен. Според него, дел од луѓето го потценувале неговиот талент, ги омаловажувале неговите концерти и го исмевале, додека зад таквиот однос се криеле завист и лични комплекси.
Тој посочува дека критиките продолжиле и кога Тоше почнал да постигнува успеси надвор од Македонија. Наместо да се почитуваат неговите достигнувања, секогаш се наоѓала нова причина за потценување.
„Тоше имаше нешто што не се купува, не се глуми и не се учи преку ноќ – чиста душа“, наведува Димитриевски, истакнувајќи ја човечноста на пејачот и љубовта што ја споделувал со луѓето.
Во емотивната порака се потсетува и на зборовите „Сите ве сакам“, со кои Тоше испраќаше порака за љубов, почит и човечност. Според Димитриевски, вистинската почит треба да се покажува додека луѓето се меѓу нас, а не откако ќе ги загубиме.
„Тоше ни остави песни, љубов и пример како треба да се биде човек. Ние нему му оставивме незаслужена неправда“, порачува тој.
На крајот од објавата, Димитриевски му посакува на Тоше да патува со ангелите, додавајќи дека луѓето и денес не ја разбираат целосно пораката што пејачот им ја остави: „Сите ве сакам“.
