Поправката на современите автомобилски фарови станува сè поскап трошок за возачите, предупредуваат осигурителните компании, кои бараат производителите да овозможат поправка на поединечни делови наместо задолжителна замена на целиот фар.
Според податоците на осигурителната компанија „Алијанц“, во Германија секоја година во сообраќајни незгоди се оштетуваат околу 870.000 фарови. Во меѓувреме, просечната цена на еден фар пораснала од 708 евра во 2015 година на 1.251 евро во 2025 година, а кај некои модели достигнува и до 6.700 евра.
Причината е сè посложената технологија. Денешните автомобили користат Matrix LED системи, ласерски светла, адаптивно осветлување и напредна електроника, поради што дури и помали оштетувања можат да резултираат со многу скапи поправки.
Од „Алијанц“ сметаат дека проблемот не е во самата технологија, туку во начинот на кој производителите ги проектираат фаровите. Во многу случаи не може да се замени само оштетеното стакло, куќиштето или електронскиот модул, туку мора да се смени целиот склоп, што значително ги зголемува трошоците.
Како позитивен пример се посочува „Тојота“, кај која кај одредени модели можат поединечно да се заменат стаклото, куќиштето, електронските компоненти и носачите на фаровите. Сличен пристап најавува и „Мерцедес-Бенц“, кој планира идните генерации фарови да ги изработува со завртки наместо со лепење, со што поправките би станале полесни и поевтини.
Покрај финансиската заштеда, можноста за поправка наместо целосна замена би придонела и за намалување на електронскиот отпад и емисиите на јаглерод диоксид при производството на нови делови.
