Светските испораки на мобилни телефони во третото тримесечје од годината се намалиле за 20 проценти во споредба со истиот период лани, достигнувајќи го најниското ниво од летото 2012 година. Причините се недостигот од мемориски чипови и растот на цените, покажуваат прелиминарните процени на истражувачката компанија Counterpoint Research.
Поскапувањето на мемориските компоненти, кои сè почесто се пренасочуваат кон инфраструктурата за вештачка интелигенција, ги зголемило трошоците за производство. Поради тоа, производителите ги зголемиле цените на уредите, ги намалиле испораките и се насочиле кон зачувување на профитабилноста, наместо кон продажба на поголем број телефони.
„Потрошувачите ги користат уредите подолго отколку што се очекуваше, сè почесто размислуваат за купување дополнителна опрема и претпочитаат модели со поголема вредност“, изјави Шилпи Џејн, виш аналитичар во Counterpoint Research.
„Самсунг“ ја задржал водечката позиција на светскиот пазар со удел од 23 проценти, благодарение на побарувачката за моделите од серијата Galaxy Z Fold 8 и достапноста на компоненти за телефоните од средната ценовна класа. Сепак, јужнокорејската компанија во третото тримесечје испорачала три проценти помалку уреди отколку во истиот период лани.
„Епл“ го зголемил својот пазарен удел на 22 проценти, првпат надминувајќи ја границата од 20 проценти во третото тримесечје, и покрај помалиот број испорачани телефони во споредба со лани.
Намалувањето на испораките делумно се поврзува со високата споредбена основа од третото тримесечје минатата година, кога „Епл“ ја претстави целата серија iPhone 17. Оваа година компанијата не го пласирала основниот модел iPhone 18, наведуваат од Counterpoint Research.
Кинеските производители „Опо“ и „Виво“ испорачале по 20 проценти помалку телефони во споредба со истиот период лани. Кај „Шаоми“, падот изнесувал околу 30 проценти, со што пазарниот удел на компанијата се намалил на 10 проценти.
Падот кај „Шаоми“ се поврзува со намалената понуда на поевтини модели и послабото присуство на одредени странски пазари, во обид компанијата да ја зачува профитабилноста.
