Приказната за Тоше Проески наскоро ќе добие нова филмска и телевизиска форма. Во Ровињ беше претставен проектот посветен на животот и кариерата на македонскиот пејач, кој ќе биде реализиран преку игран филм, играна серија и документарна серија.
Проектот го претставија продуцентот Пеце Талески, авторот Игор Стоименов и сценаристите Милана Влаовиќ и Андреј Волкашин. Тие посочија дека главниот предизвик е да се раскаже поинаква приказна за Тоше, имајќи предвид дека неговиот живот и кариера се добро познати на јавноста.
Во центарот на проектот ќе биде човекот зад големата музичка ѕвезда – неговиот живот надвор од сцената, личните желби, соништата, верата и стремежот кон обичен живот. Авторите сакаат преку филмот и сериите да понудат нови детали и перспективи за личноста на Тоше Проески.
Како една од главните нишки во приказната ќе биде искористена реченицата што Тоше ја кажал во своето последно интервју, само неколку часа пред трагичната смрт: „И јас би сакал да го познавам тој Тоше“.
Авторот на проектот, Игор Стоименов, вели дека токму оваа реченица ја опишува суштината на приказната што сакаат да ја раскажат.
„Сакам да го пронајдам Тоше – момчето од Крушево, од малото место на покривот на Македонија. Сакам да покажам кој стоел зад гласот, концертите, насловните страници и митот“, вели Стоименов.
До својата 26-та година, Тоше со својот тенор се движеше низ различни музички жанрови, од поп и рок до традиционална музика и оперски арии. Авторите посочуваат дека во исто време со растот на неговата популарност, сè помалку простор останувал за неговиот приватен живот.
Според продуцентот Пеце Талески, уште од почетокот било јасно дека приказната не може да се опфати само со еден формат, поради што се развива истовремено како игран филм, играна серија и документарна серија.
Сценаристите Милана Влаовиќ и Андреј Волкашин откриваат дека тимот досега спровел голем број разговори и интервјуа со луѓе кои го познавале Тоше, ги посетувал местата поврзани со неговиот живот и собирал достапни материјали, сведоштва и сеќавања.
Целта, како што беше посочено на презентацијата, е од големиот број факти и познати моменти да се издвои приказната за човекот кој постоел надвор од рефлекторите.
Проектот сè уште е во подготовка, а претставувањето во Ровињ беше првиот поголем увид во неговиот креативен и истражувачки процес.
