Американската технолошка компанија Meta претстави нов систем на вештачка интелигенција наменет за деловни корисници, со кој компаниите ќе можат да автоматизираат голем дел од секојдневните активности.
Новиот „деловен агент“, претставен на конференцијата во Лондон, им овозможува на фирмите автоматизирано да комуницираат со клиентите, да закажуваат состаноци, да обработуваат нарачки и да реализираат продажба преку платформите WhatsApp, Messenger и Instagram.
Од компанијата соопштија дека повеќе од еден милион бизниси веќе користат претходни верзии на нивните деловни чет-ботови базирани на вештачка интелигенција, додека новата генерација алатки ќе биде достапна за претпријатија од сите големини ширум светот.
Според информациите на Мета, деловниот агент може да одговара на прашања од корисници, да обезбедува информации за производи и услуги, да препознава потенцијални купувачи и посложените барања да ги препраќа до вработените.
Истовремено е претставена и нова платформа што ќе им овозможи на компаниите да развиваат сопствени агенти со вештачка интелигенција и да ги поврзуваат со други деловни системи, вклучувајќи платформи за електронска трговија и корисничка поддршка.
