Осветлувањето на божиќната елка на плоштадот „Свети Петар“ во Рим оваа година за првпат ќе се одржи истовремено со осветлувањето на најголемата божиќна елка во светот, која се наоѓа во градот Губио, во централна Италија.
Елката што ќе го краси плоштадот „Свети Петар“ е величествена сребрена ела, висока 24 метри и тешка 7.500 килограми. Таа е донесена од шумата Куњо дел Ачерo, која се наоѓа во рамките на Националниот парк Полино, во јужна Италија, пренесува агенцијата АНСА.
Елката пристигнала во Ватикан утрото на 19 ноември, по што веднаш била поставена. Таа е подарок од општината Теранова ди Полино, во провинцијата Потенца.
Посебен момент ќе биде самото осветлување на елката, закажано за 7 декември во 17:30 часот. Копчето со кое ќе бидат вклучени светилките ќе го притиснат деца кои се лекуваат на онколошките одделенија во италијанските болници.
Настанот ќе се пренесува во живо преку директна врска со градот Губио, каде што на падините на планината Инџино се наоѓа најголемата божиќна елка во светот.
Нејзиното осветлување го создаваат повеќе од 50.000 паметни ЛЕД-светилки, способни да произведуваат впечатливи и динамични светлосни ефекти.
Покрај елката на плоштадот „Свети Петар“, во Ватикан ќе бидат донесени и неколку помали елки, кои ќе бидат поставени во канцелариите и зградите на Светата столица, како и во Апостолската палата во Кастел Гандолфо.