Здравствената состојба на српскиот пејач Саша Ковачевиќ се влошила по операцијата на стапалото, на која бил подложен пред околу 20 дена, поради што неговите претстојни концерти се одложуваат. Информацијата ја соопшти неговиот менаџер преку објава на социјалните мрежи.
Во официјалното известување се наведува дека пејачот во моментов не е во можност да настапи на претходно утврдените датуми. Поради тоа, публиката во повеќе градови во Србија и регионот ќе мора да ги почека новите термини за концертите.
„Ве известуваме дека претстојните концерти на Саша Ковачевиќ се одложуваат поради влошување на неговата здравствена состојба по операцијата на стапалото, поради што во моментов не е во можност да настапи во првично закажаните термини“, се наведува во соопштението.
Организаторите најавија дека информациите за новите датуми ќе бидат објавени дополнително. Влезниците што веќе се купени ќе важат и за новите термини.
„Се надеваме дека здравствената состојба на Саша Ковачевиќ наскоро ќе се подобри, за турнејата да продолжи и преостанатите концерти да се одржат според планот“, се наведува во известувањето, во кое е упатена и благодарност до публиката за разбирањето и поддршката.
Ковачевиќ неодамна го оперирал стапалото, но само три дена по интервенцијата настапил пред публиката во Мајданпек. И покрај силните болки и отежнатото движење, тој не сакал да го откаже концертот, па најголемиот дел од настапот го одржал седејќи на стол, со ногата во лонгета.
Сепак, подоцнежното влошување на здравствената состојба довело до одлука за одложување на претстојните настапи. Засега нема информации колку ќе трае закрепнувањето, а новите датуми за концертите треба да бидат објавени во наредниот период.
