Убави, достапни и лесно вклопливи во различни стилови на уредување, керамичките саксии често се прв избор за љубителите на собни растенија. Но, некои од нив имаат сериозен недостаток што може да доведе до пропаѓање на цвеќињата – немаат отвори за одвод на вишокот вода.
Правилното истекување на водата по наводнувањето е важно за здравиот раст на растенијата. Кога саксијата нема отвори на дното, водата се задржува во почвата, поради што коренот предолго останува во влажна средина и почнува да гние. Со текот на времето, растението слабее и може целосно да пропадне.
Затоа, при купување саксија не треба да се обрнува внимание само на изгледот, туку и на тоа дали има отвори за дренажа и дали тие се проодни.
Ако веќе имате керамичка саксија, не мора веднаш да ја замените. Често во неа има посебна пластична саксија со отвори, додека керамичката служи само како украсна обвивка. Во тој случај, при наводнување извадете го растението и оставете го вишокот вода целосно да истече пред да го вратите.
Доколку, пак, растението е засадено директно во керамичка саксија без отвори за одвод, се препорачува да го пресадите во соодветен сад со дренажни отвори.
