Редовното пиење кафе може да биде поврзано со промени во функционирањето на дигестивниот систем, вклучително и почести контракции на дебелото црево и поголема разновидност на цревните бактерии. Ова го покажало истражување на Универзитетот во Копенхаген, објавено во научното списание „Gut Microbiology“.
Во истражувањето учествувале 61 здрав возрасен испитаник од Данска, поделени во две групи според тоа колку често консумираат кафе. Научниците користеле мала електронска капсула што учесниците ја голтале, а која при минувањето низ дигестивниот тракт ги мерела температурата, киселоста, времето на варење и контракциите на цревата.
Резултатите покажале дека луѓето кои редовно пијат од една до пет шолји кафе дневно имаат поразновиден состав на цревни микроорганизми и пониско ниво на киселост во тенкото црево во споредба со оние кои поретко консумираат кафе.
Истражувачите утврдиле и поврзаност меѓу поголемата консумација на кафе и почестите контракции на дебелото црево. Станува збор за мускулни движења што овозможуваат движење на содржината низ дигестивниот систем и придонесуваат за редовно празнење на цревата.
Главната авторка на истражувањето, Франческа Бучи од Универзитетот во Копенхаген, посочила дека редовното консумирање кафе, изгледа, влијае врз физиолошките процеси во цревата. Вонредниот професор и раководител на истражувачката група, Хенрик Мунх Ројагер, потсетил дека и претходни истражувања укажуваат на влијанието на кафето врз различни процеси во системот за варење.
Сепак, научниците нагласуваат дека истражувањето не докажува оти кафето директно ги предизвикува забележаните промени. Засега не е утврдено ниту дали намалената киселост во тенкото црево има позитивно или негативно влијание врз здравјето.
Како следен чекор, истражувачите планираат контролирана студија во која ќе ја одредуваат количината на кафе што ја консумираат учесниците, за попрецизно да утврдат дали токму кафето е причина за промените во варењето и активноста на цревата.
