Ако често чувствувате глад меѓу оброците, не мора веднаш да посегнете по чипс, слатки или друга висококалорична храна. Постојат здрави и вкусни ужини со малку калории кои можат да ве заситат и да бидат дел од балансирана исхрана.
Пуканки
Пуканките се меѓу најнискокалоричните грицки, доколку се подготвени без путер и други калорични додатоци. Најдобро е да се испечат со неколку капки масло и малку сол. Богати се со растителни влакна, кои придонесуваат за подобро варење и подолго чувство на ситост.
Тиквички
Тенко исечените свежи тиквички, подготвени како карпачо, се лесна и освежителна ужина. Доволно е да ги прелиете со сок од лимон, да ги оставите кратко да отстојат, а потоа да додадете неколку капки маслиново масло, сол и бибер.
Кисели краставички
Околу 200 грама кисели краставички содржат само 16 калории. Тие се чест избор во различни режими на исхрана и лесно се комбинираат со многу јадења.
Чипс од кељ
Чипсот од кељ е поздрава алтернатива на класичниот компир-чипс. Листовите се чистат од тврдите дршки, се кинат на помали парчиња, лесно се премачкуваат со масло, се посолуваат и се печат околу десет минути додека не станат крцкави.
Јаткасти плодови
Бадемите, оревите и лешниците се хранлива ужина која обезбедува здрави масти, протеини и растителни влакна. Иако се покалорични од останатите предлози, една мала шака е доволна за да ве засити и да ви обезбеди енергија до следниот оброк.
