Протеините се важен дел од здравата исхрана бидејќи помагаат во одржување на мускулната маса, придонесуваат за стабилно ниво на шеќер во крвта и обезбедуваат подолго чувство на ситост. Сепак, нутриционистите предупредуваат дека нивниот прекумерен внес може да ја наруши рамнотежата во исхраната и да предизвика низа непријатни симптоми.
Во последните години протеините станаа еден од најпопуларните нутритивни трендови, па денес се додаваат во многу производи, од житарки за појадок и грицки до протеински плочки и напитоци.
Експертите посочуваат дека прекумерниот внес на протеини често оди на сметка на храната богата со растителни влакна, витамини, минерали и јаглехидрати, кои се главен извор на енергија за организмот.
Еден од најчестите знаци е појавата на запек, особено ако исхраната содржи малку овошје, зеленчук, мешунки и интегрални житарки. Затоа се препорачува поголем внес на растителни извори на протеини, како грав, леќа, јаткасти плодови, семки и интегрални житарки, кои покрај протеини обезбедуваат и растителни влакна.
Друг можен симптом е почестото мокрење. При многу висок внес на протеини, бубрезите мора да исфрлаат поголемо количество отпадни материи, што ја зголемува потребата од течности и може да доведе до дехидратација. Таа најчесто се манифестира со силна жед, замор, вртоглавица и намалена концентрација.
Ако протеините ги заменат јаглехидратите, можно е да се појават замор, намалена физичка издржливост и зголемена желба за благо. Иако протеините се неопходни за изградба и обновување на мускулите, јаглехидратите остануваат главниот извор на енергија, особено при физичка активност.
Прекумерниот внес на протеини може да придонесе и за зголемување на телесната тежина, особено ако протеинските плочки, шејковите и другите производи се додаваат во исхраната наместо да заменат друг оброк.
Според најновите препораки за исхрана, повеќето здрави возрасни лица имаат потреба од околу 1,2 до 1,6 грама протеини на килограм телесна тежина дневно, а точната количина зависи од возраста, физичката активност и општата здравствена состојба.
