Пушењето не го загрозува само здравјето на срцето и белите дробови, туку е поврзано и со зголемен ризик од деменција. Голем научен преглед, кој опфатил податоци за околу 2,8 милиони луѓе, покажал дека пушачите имаат поголема веројатност да развијат деменција, Алцхајмерова болест и васкуларна деменција.
Според истражувањето предводено од научници од Австралија, пушачите имаат 31 отсто поголем ризик од деменција во споредба со луѓето што никогаш не пушеле. Ризикот од Алцхајмерова болест е поголем за 40 отсто, а од васкуларна деменција за 52 отсто.
Кај васкуларната деменција, која настанува кога мозокот не добива доволно крв поради оштетени крвни садови, поврзаноста со пушењето е најизразена. Тоа се поврзува со штетното влијание на цигарите врз крвните садови низ телото.
Истражувачите утврдиле и дека ризикот расте со бројот на испушени цигари. Кај луѓето што пушат по десет цигари дневно ризикот од деменција е поголем за 16 отсто, додека кај оние што пушат по една кутија дневно се зголемува за 34 отсто.
Сепак, истражувањето носи и охрабрувачки резултати. Луѓето што се откажале од пушењето немаат поголем ризик од деменција во споредба со оние што никогаш не пушеле, а ризикот им е помал отколку кај луѓето што продолжуваат да пушат.
Научниците нагласуваат дека резултатите не докажуваат директна причинско-последична врска меѓу пушењето и деменцијата, но претставуваат дополнителен доказ за можните придобивки од откажувањето од цигарите.
Авторите сметаат дека во кампањите против пушењето треба повеќе да се зборува и за последиците врз здравјето на мозокот, помнењето и способноста за размислување. Препорачуваат предупредувањата на кутиите цигари да го опфатат и овој ризик, а информациите да бидат дел и од програмите за откажување од пушењето.
Најавени се и дополнителни истражувања за да се утврди дали времето на откажување и периодот поминат без цигари влијаат врз ризикот од деменција.
