Иако свеста за штетното влијание на сончевите зраци е сè поголема, многу луѓе и понатаму веруваат во погрешни тврдења поврзани со кремите за сончање и заштитата од УВ-зрачењето.
Дерматолозите предупредуваат дека постојат неколку чести заблуди кои можат да доведат до недоволна заштита на кожата.
Првиот мит е дека кремата за сончање сама по себе е доволна за целосна заштита од сонцето. Според дерматологот Стивен Нелсон од Клиниката „Мајо“, повеќето луѓе не нанесуваат доволно количество крема за да го постигнат заштитниот фактор наведен на пакувањето. Затоа, покрај користењето крема со заштитен фактор, се препорачува избегнување директно изложување на сонце во периодот од 11 до 16 часот, носење шешир, лесна облека и престој под сенка.
Втората заблуда е дека кремите за сончање се опасни бидејќи одредени состојки можат да се апсорбираат во крвотокот. Иако некои хемиски УВ-филтри навистина можат да се детектираат во крвта по нанесувањето, досегашните истражувања не покажале дека тие го зголемуваат ризикот од рак или предизвикуваат хормонални нарушувања кај луѓето. Најчести несакани ефекти се можни иритации или алергиски реакции на кожата.
Третиот мит е дека кремите за сончање го спречуваат создавањето витамин Д. Експертите посочуваат дека користењето крема најчесто не доведува до недостаток на овој витамин, бидејќи во пракса луѓето ретко нанесуваат количина што целосно ги блокира УВ-зраците. Доколку постои недостаток на витамин Д, лекарите препорачуваат соодветна исхрана или суплементи, наместо изложување на сонце без заштита.
