Антониа Гиговска размислува за учество на Евровизија и веќе има неколку музички идеи со композиторите Дарко Димитров и Лазар Цветкоски. Таа во „Вечер во Охрид со Ландов и Вик“ рече дека би сакала да ја претставува Македонија, но дека конечниот избор треба да го направи публиката.
„Не знам дали ќе ме избере публиката. Се надевам и би сакала“, рече Гиговска.
Прашана дали веќе подготвува песна со која би се пријавила на можниот избор, таа потврди дека се разгледуваат неколку идеи.
„Да ти кажам искрено, имаме неколку идеи со Дарко и со Лазе“, изјави Гиговска, потврдувајќи дека станува збор за Дарко Димитров и Лазар Цветкоски.
Во разговорот беше отворена и можноста за заеднички настап со друг изведувач, но Гиговска беше јасна дека себеси се гледа како самостоен претставник.
„Не знам дали би отишла заедно со некого. Дефинитивно се гледам сама на таа сцена“, рече таа.
Гиговска ги оцени како шега објавите на социјалните мрежи во кои однапред се прогласува дека таа или Бојан Јовановски ќе биде следниот македонски претставник. Според неа, најверојатно ќе има избор на кој кандидатите ќе треба да се натпреваруваат.
Таа ја поддржа и можноста за враќање на Скопскиот фестивал, посочувајќи дека фестивалот претставувал симбол и за Скопје и за Македонија.
