Новата, осма сезона на реалити-серијата „Кардашијанс“ започна со необично воведно видео во кое Крис Џенер, Ким Кардашијан, Кортни Кардашијан, Клои Кардашијан, Кендал Џенер и Кајли Џенер се претставени преку дигитални двојници создадени со вештачка интелигенција. Но, вистинските членови на семејството набргу се појавуваат пред своите виртуелни верзии, испраќајќи порака дека технологијата не може да ги замени, пренесува „Пипл“.
Новата сезона премиерно беше прикажана на 8 октомври на платформата „Хулу“, а воведното видео ги прикажува сестрите и нивната мајка во гламурозни, но нереални сцени.
Крис Џенер пие мартини на јахта во Сен Тропе, Кортни е во Јапонија со сопругот Тревис Баркер, а Клои ужива на сафари во Кенија со двајца туристички водичи. Кендал и Кајли се на забава во Версај, додека Ким е прикажана во скијачка куќичка во Швајцарија.
Потоа семејството се собира во Калабасас за да започне со снимањето, но дигиталните верзии почнуваат да се менуваат на бизарен начин. На Клои ѝ се појавува огромно око, увото на Ким отекува, а Кајли одеднаш добива опашка.
„Чекајте, дали и ние сме вештачка интелигенција? Дали цело време сме биле вештачка интелигенција?“, прашува Ким, на што Кортни ѝ одговара: „Мислам дека ќе знаевме ако бевме вештачка интелигенција, Кимберли“.
Дигиталната верзија на Крис потоа објаснува дека вештачката интелигенција би била попрактична за снимањето бидејќи нема проблеми со распоредот, не ѝ треба шминка и може да плаче на команда без да ја расипе.
Но, вистинската Крис не се согласува со тоа.
„Не знам со кого мислите дека разговарате, но ова вистинско семејство не може да биде заменето“, возвраќа таа.
Ким се надоврзува со зборовите: „Не ни треба вештачка интелигенција кога ја имаме оваа реалност“.
На крајот, Клои го активира прекинувачот за исклучување, по што дигиталните двојници почнуваат да исчезнуваат. Додека виртуелните верзии се топат, Крис им покажува среден прст.
„Вештачката интелигенција никогаш не би можела да нè замени“, изјавува Кортни, по што на екранот се појавува насловот на новата сезона: „Кардашијанс: Вештачката интелигенција никогаш не би можела“.
Осмата сезона носи ново поглавје во животот на познатото семејство. Според најавата, епизодите ќе се занимаваат со љубовта, личниот развој и идните предизвици, додека Крис, Кортни, Ким, Клои, Кендал и Кајли се обидуваат да ги усогласат деловните обврски со личниот живот.
Во фокусот ќе бидат новите врски, неочекуваните љубовни искри, заздравувањето на старите рани и стремежот кон независност. Новите епизоди се емитуваат секој четврток на платформата „Хулу“.
