Марко Пејчиноски вели дека тешките здравствени и семејни моменти низ кои поминал не ги гледа како проблеми, туку како искуства што го направиле посилен и подобар човек.
Во „Вечер во Охрид со Ландов и Вик“ тој рече дека неговата смиреност и истрајност најмногу произлегуваат од вербата во Бога.
„Најпрво е мојата верба. Сè доаѓа од вербата во Бога, од мојата вера, а потоа е максималниот труд во сè што се прави. Ако е по Божја волја, знам дека ќе успеам. Знам дека ќе дадам сè од своја страна, но ако е во неговата волја, знам дека ќе успеам. Тоа е начинот да се отстрани стресот, затоа што на крајот сè ќе биде во ред“, рече Пејчиноски.
Тој нагласи дека, освен здравствените состојби, повеќето проблеми во животот се минливи.
„Ситуациите што ми се случиле не ги гледам како проблеми, бидејќи сум пораснал и сум научил нешто од нив. Ме направиле подобар човек и едноставно немам причина да ги нарекувам проблеми“, изјави тој.
Пејчиноски рече дека најголемата поддршка во најтешките моменти ја добил од своето семејство.
„Најголемата поддршка и најголемата помош ми биле, на прво место, татко ми, а потоа брат ми. Тие секогаш ќе бидат мојата најголема поддршка, најголема инспирација и херои во мојот живот“, рече Пејчиновски.
