Meta го претстави Muse, нов личен агент базиран на вештачка интелигенција кој оди чекор подалеку од класичните четботови – наместо само да одговара на прашања, може самостојно да извршува задачи во име на корисникот.
Muse може да испраќа електронска пошта, да организира патувања, да помага при купување, да работи со календарот и да презема други активности во поврзаните апликации и услуги. Корисникот одредува до кои сервиси и податоци агентот ќе има пристап.
На пример, корисникот може едноставно да му каже на Muse дека треба да организира патување, наместо самиот да пребарува повеќе страници и апликации. AI агентот може да ги преземе потребните чекори, а за чувствителни активности, како испраќање порака или извршување купување, Meta наведува дека бара одобрение од корисникот.
Muse може и да „памети“ информации што корисникот претходно ги споделил. Meta како пример наведува дека агентот може од рецепт зачуван на Instagram да направи листа за пазарење, да предложи мени за вечера и да ги земе предвид прехранбените ограничувања на пријателите на корисникот.
Технологијата работи преку таканаречениот Muse Secure VM – посебна виртуелна машина во облакот со сопствен прелистувач. Во неа се извршува агентот и се чуваат податоците и пристапите до услугите што корисникот одлучил да ги поврзе.
Meta тврди дека Muse нема директен увид во лозинките и платежните податоци, а дополнителен систем наречен Sentinel ги контролира активностите што агентот се обидува да ги изврши. Компанијата наведува и дека разговорите со Muse и податоците во виртуелната машина не се споделуваат со нејзините системи за рекламирање.
Токму широкиот пристап до личните податоци, сепак, отвора прашања за приватноста и безбедноста. Reuters објави дека во интерните тестирања биле забележани безбедносни и проблеми со сигурноста на системот, а Meta претходно го одложила лансирањето за дополнително да работи на заштитата.
Muse во меѓувреме пристигна и на Mac. Таму, доколку корисникот му даде дозвола, може да комуницира со фајловите, Messages, Calendar, Notes и Mail и да извршува активности директно преку компјутерот.
Новиот AI агент предизвика голем интерес веднаш по лансирањето. Само неколку дена по објавувањето, Muse се искачи меѓу најпреземаните бесплатни апликации на американскиот App Store. Според податоци на Sensor Tower објавени од TechCrunch, до 10 септември бил преземен повеќе од 83.000 пати на iOS во САД.
Muse засега се пушта во САД на iOS и Android, достапен е и преку веб, а може да се користи и преку WhatsApp. Meta најавува дека во иднина ќе го интегрира и во своите AI очила. Основните можности се достапни бесплатно, додека за поинтензивно користење се предвидени претплатнички пакети.
Со Muse, Meta практично се обидува да ја помести вештачката интелигенција од фазата „прашај и добиј одговор“ кон модел во кој AI добива дозвола самостојно да презема конкретни активности во дигиталниот живот на корисникот.
