Бојан Јовановски, познат како Боки 13, вели дека парите со кои располага ги заработува преку својата продукција, поткастот, настапите и други договори што ги склучува.
Во „Вечер во Охрид со Ландов и Вик“ тој директно одговори на прашањето што, како што рече, постојано се поставува во јавноста – од каде му се парите за скапата облека и чанти.
„Јас сум сега сопственик на ‘Б13 продукција’, каде што се емитува мојот поткаст. Фала му на Бога, добро знам да ги наплатам сите свои проекти“, рече Јовановски.
Тој тврди дека неговите приходи се резултат на голем број договори и на вложувањето во сопствените проекти.
„Дај Боже сите, со толку труд и работа колку што вложувам јас во својата работа, да заработуваат и толку скапо да наплаќаат. Јас сум скап артист, не сум евтин, но вложувам“, изјави Боки 13.
Според него, минатата година потпишал договори со високи надоместоци, меѓу кои и договор за учество во музичкото натпреварување „Хајп ѕвезди“.
„Заработувам. Во изминатата година навистина имам големи договори што сум ги потпишал и сето тоа е исплатено преку ‘Б13 продукција’ во легален тек“, рече Јовановски.
Тој додаде дека, покрај јавните настапи и поткастот, работи и на други проекти. Во емисијата објави дека станал извршен продуцент на филм и серија за српската пејачка Лепа Лукиќ.
