Марко Пејчиновски најави дека се обидува да му се врати на пливањето и дека, доколку закрепнувањето тече според планот, следната година би можел да го изведе најголемиот подвиг во својата досегашна кариера.
Во „Вечер во Охрид со Ландов и Вик“, Пејчиновски нагласи дека по операцијата на рамото не може да даде цврсто ветување, но дека ќе направи сè што е во негова моќ за повторно да заплива.
„Ќе се обидам и ќе дадам сè од себе. Ако успеам во мојот обид, најверојатно би ме виделе следната година, но не гарантирам ништо. Тоа би бил најголемиот подвиг во мојот живот“, рече Пејчиновски.
Тој откри дека веќе размислува и за завршување на својата пливачка кариера, но пред тоа сака да изведе уште еден или два големи подвизи.
„Би бил еден од последните подвизи, бидејќи имам уште еден или два во мојата кариера. Веќе го гледам крајот на кариерата, но имам уште еден до два големи подвизи“, изјави тој.
Пејчиноски не откри што точно планира, но рече дека замислениот потфат би предизвикал големо меѓународно внимание.
„Се надевам дека ќе можам да се вратам, бидејќи пливањето за мене е како втор дом. Ако успеам, подвигот ќе биде толку голем што мислам дека името на Охрид, Македонија и Охридското Езеро ќе се слушне низ целиот свет“, рече Пејчиноски.
