Антониа Гиговска не треба по секоја цена да се обидува да стигне до Евровизија, туку треба да почека вистински проект и соодветни услови, порачаа Стефан и Мартин Филиповски од „Некст тајм“.
Во „Вечер во Охрид со Ландов и Вик“, браќата се потсетија и на сопственото евровизиско искуство од 2009 година, кога ја претставуваа Македонија со песната „Нешто што ќе остане“.
Еден од браќата откри дека за ова прашање разговарал со Гиговска на роденден кај нивни заеднички пријател.
„Ѝ кажав дека можеби не треба да ги форсира работите. Евровизија треба неа да ја побара, не таа по секоја цена да оди таму. Ние, како млади момчиња, отидовме по секоја цена“, беше кажано во разговорот.
Членовите на „Некст тајм“ посочија дека нивното искуство не било лесно и дека евровизискиот претставник мора да има вистинска поддршка.
„Стефан се врати со трауми од патувањето. Мислам дека на секој што ќе отиде треба да му се даде вистинска можност, да избере добар тим и да има одврзани раце“, порачаа од „Некст тајм“.
Прашани дали би го поддржале Боки 13 како македонски претставник, тие во шеговит тон одговорија дека би го испратиле, а потоа додадоа дека неговите нови песни и видеозаписи се добро изработени.
