Фановите на легендарната американска пејачка Доли Партон се загрижени за нејзиното здравје, откако 80-годишната музичка ѕвезда во петокот го откажа личното појавување во својот тематски парк „Доливуд“ во Тенеси.
Наместо лично да присуствува на отворањето на новиот ролеркостер „NightFlight Expedition“, Партон им се обрати на посетителите преку интернет од својот дом во Нешвил. Таа објасни дека имала неколку помали здравствени проблеми, поради што нејзиниот лекар ѝ препорачал оваа недела да не патува.
Партон откри дека понекогаш чувствува вртоглавица и дека често е дехидрирана. Таа сепак ги увери обожавателите дека ќе ги информира за својата состојба и им се заблагодари за поддршката.
Ова не е првпат годинава нејзиното здравје да биде причина за откажување на јавни настапи. Во мај таа ја откажа својата шестдневна резиденција во Лас Вегас, која претходно веќе беше одложена за септември. Партон тогаш објасни дека имала здравствени проблеми и дека со години се соочува со бубрежни камења, а во последните три години имала нарушувања и во имунолошкиот и во дигестивниот систем.
Пејачката подоцна истакна дека добро реагира на терапијата и дека постепено се опоравува. Во јуни повторно се појави во јавноста на отворањето на „Dolly’s Tennessean Travel Stop“ во Тенеси, а во март присуствуваше и на отворањето на 41. сезона на „Доливуд“.
Нејзиното најново откажување повторно предизвика бројни реакции од обожавателите, кои на социјалните мрежи ѝ испратија пораки за поддршка и ѝ посакаа брзо закрепнување.
