Компанијата „Принглс“ организираше необична наградна игра во САД, во која учесниците можеа да освојат специјално изработена погребна урна во форма на препознатливата кутија за чипс, како и парична награда од 28.080 долари, претставена како вредност на 200-годишна залиха од производот.
За учество, полнолетните жители на САД требало да потпишат симболичен тестамент наречен „Will and Taste-ament“, со кој изразуваат желба нивната пепел по смртта да биде сместена во урна во форма на кутија „Принглс“. Сепак, документот нема правна сила и победникот не е обврзан да ја исполни оваа желба.
Паричната награда е пресметана врз основа на 52 кутии чипс годишно во период од 200 години, односно вкупно 10.400 кутии. Наместо толкаво количество чипс, победникот ќе добие 28.080 долари и специјално изработената урна.
Идејата за кампањата потекнува од вистинска приказна за Фредрик Баур, дизајнерот на препознатливата цилиндрична амбалажа на „Принглс“. Тој посакал по смртта дел од неговата пепел да биде ставен во една од кутиите што ги создал. Неговото семејство ја исполнило желбата во 2008 година.
Наградната игра започна на 13 октомври, а пријавувањето заврши на 22 октомври 2026 година. Победникот се очекува да биде известен до крајот на месецот.
