Корисниците што немаат сметка на Reddit наскоро би можеле да го загубат пристапот до содржините на платформата. Компанијата потврди дека планира да воведе модел според кој за прегледување на објавите ќе биде потребно најавување, но засега не е утврдено кога промената ќе стапи во сила.
Извршниот директор на Reddit, Стив Хафман, објасни дека целта е да се подобри корисничкото искуство, но и да се заштити базата на податоци на платформата. Според него, задолжителното најавување ќе им помогне на корисниците полесно да ги пронаоѓаат содржините и заедниците што ги интересираат, а на компанијата ќе ѝ обезбеди повеќе податоци за насочено рекламирање и поголема активност.
Хафман најави дека во четвртиот квартал ќе започне тестирање на новиот модел на одредени пазари надвор од САД. Резултатите ќе послужат за подготовка на глобалната верзија на Reddit, која ќе биде достапна само за најавени корисници.
Одлуката доаѓа во период кога Reddit бележи значителен пад на посетите од пребарувачите, особено кај корисниците кои не се најавени. Компанијата подоцна појаснила дека станува збор за просечно повеќе од еден милион посети неделно.
Како една од причините за промената, Хафман го посочил и неовластеното собирање податоци за развој на вештачка интелигенција. Според него, најголемиот дел од таквиот пристап, кој го опишал како извлекување и кражба на податоци, доаѓа од корисници кои не се најавени.
Сепак, сè уште не е познато кои содржини ќе останат достапни за посетителите без сметка. Хафман посочил дека е важно почетната страница да биде достапна за оние што доаѓаат преку пребарувачи или надворешни линкови, за да можат да ја видат содржината кон која водат.
Во однос на анонимното прелистување, тој најавил дека Reddit го редизајнирал и повторно го воведува анонимниот режим во апликацијата. Новината доаѓа набргу по воведувањето на персонализираната почетна страница „За тебе“ (For You).
