Начинот на кој луѓето комуницираат со четботовите базирани на вештачка интелигенција е различен – некои се љубезни, други користат закани, а трети бараат од системот да се однесува како експерт. Сепак, најновите истражувања покажуваат дека повеќето од овие „трикови“ немаат значително влијание врз квалитетот на одговорите, пренесува Би-Би-Си.
Според експертите, многу поважно од изборот на зборови е јасно да се објасни што точно се бара од вештачката интелигенција. Професорот Џулс Вајт од Универзитетот „Вандербилт“ смета дека суштината е во начинот на формулирање на барањето, а не во тоа дали ќе се користат љубезни изрази.
Темата за љубезноста стана актуелна и по шегата на извршниот директор на OpenAI, Сем Олтман, кој изјави дека компанијата потрошила „десетици милиони долари“ за електрична енергија поради корисниците кои на четботовите им пишуваат „ве молам“ и „благодарам“.
Истражувањата, пак, даваат различни резултати. Една студија покажала дека љубезните барања можат да доведат до попрецизни одговори, но ефектот се разликува зависно од јазикот и културниот контекст. Друго истражување покажало дека во одредени ситуации четботот давал попрецизни одговори дури и кога корисникот бил груб.
Експертите истакнуваат дека поновите модели на вештачка интелигенција многу подобро ја препознаваат суштината на барањето и не зависат толку од мали јазични разлики.
Наместо да се потпираат на необични техники, стручњаците препорачуваат неколку едноставни правила за подобра комуникација со четботовите. Корисно е да се побараат повеќе верзии на одговорот, да се приложат примери што го покажуваат посакуваниот стил на пишување, како и четботот да поставува дополнителни прашања пред да даде конечен одговор.
Исто така, се советува внимателно користење на играњето улоги. Иако тоа може да биде корисно за креативни задачи или подготовка за интервју за работа, кај барањата што се однесуваат на факти може да доведе до поголема самоувереност на моделот и до неточни информации.
Експертите препорачуваат и корисниците да останат неутрални при поставување прашања, без однапред да го насочуваат одговорот со сопствено мислење.
Иако љубезноста не гарантира попрецизни одговори, повеќето луѓе и понатаму избираат да бидат учтиви во комуникацијата со вештачката интелигенција. Според истражувањата, околу 70 проценти од корисниците користат изрази како „ве молам“ и „благодарам“, најчесто затоа што сметаат дека тоа е пристојно однесување, а не затоа што очекуваат подобар одговор.
