Ако за време на лет некогаш повнимателно сте го погледнале прозорецот од авионот, веројатно сте забележале мала дупка на неговата површина.
На прв поглед може да изгледа како оштетување или нешто поради што треба да го известите кабинскиот персонал, но станува збор за дел кој има важна функција.
Прозорците на патничките авиони се состојат од повеќе слоеви, а меѓу нив постои простор кој овозможува правилно функционирање на целиот систем. Дупката се наоѓа на внатрешниот слој од прозорецот и служи за регулирање на притисокот меѓу одделните слоеви.
Тоа е особено важно за време на летот бидејќи притисокот надвор од авионот и во кабината значително се разликуваат. Како што авионот се искачува на големи височини, надворешниот воздушен притисок опаѓа, додека во кабината се одржува притисок кој им овозможува на патниците и екипажот нормално да дишат.
Поради таа разлика, прозорците за време на летот се изложени на голем притисок. Нивната повеќеслојна конструкција помага во распределбата на оптоварувањето, додека дупката овозможува притисокот во просторот меѓу слоевите постепено да се изедначува.
Дупката има уште една функција. Просторот меѓу слоевите на прозорецот може да содржи влага, а промените на температурата за време на летот можат да доведат до кондензација. Отворот овозможува струење на воздухот и помага да се намали можноста прозорецот да се замагли или замрзне.
Важно е да се нагласи дека дупката не е знак дека прозорецот е оштетен. Таа е дел од неговиот дизајн и се наоѓа на слојот кој е предвиден токму за оваа функција.
