Ирската нискобуџетна авиокомпанија „Рајанер“ побара од Европската комисија итно да го реформира системот за контрола на воздушниот сообраќај во Европа, откако дефект на опремата во грчкиот систем предизвика сериозни нарушувања во воздушниот простор на Грција.
Поради дефектот во вторникот, 1 септември, доцнеле 37 летови на „Рајанер“, а биле погодени речиси 7.000 патници, со доцнења до три часа.
Од компанијата велат дека ова е четврти голем дефект во Грција во последните 12 месеци и ја обвинија грчката Влада дека не обезбедува соодветно финансирање и одржување на инфраструктурата за контрола на воздушниот сообраќај.
„Неприфатливо е патниците кои патуваат кон и од една од најфреквентните туристички дестинации во Европа и понатаму да трпат нарушувања“, соопшти „Рајанер“, додавајќи дека системите се застарени и недоволно финансирани.
Компанијата упати критики и до Европската комисија, оценувајќи дека таа постојано зборува за конкурентност и ефикасност, но не презема доволно мерки за повторливите проблеми со системите за контрола на летањето во Европа.
Главниот оперативен директор на „Рајанер“, Нил МекМахон, порача дека грчкиот систем е „целосно неподготвен“ за сигурно функционирање во периодот на најголема туристичка фреквенција.
„Европската комисија мора итно да интервенира, да спроведе реформи во неуспешниот европски систем за контрола на летањето и да ги повика одговорните на одговорност. На европските патници им е доста“, порача МекМахон.
