Американската авиокомпанија United Airlines воведува нови ограничувања при купувањето авионски билети, забранувајќи им на ВИ-агентите да резервираат летови во име на патниците. Забраната важи без оглед на тоа дали резервацијата се прави преку интернет-страницата на компанијата, туристичка агенција или платформа за споредување летови.
Одлуката е образложена со ризиците за безбедноста и приватноста на патниците. United е меѓу сè поголемиот број компании кои го ограничуваат пристапот на ВИ-агентите до своите услуги. Слични мерки веќе имаат воведено и JPMorgan Chase и Amazon.
Од авиокомпанијата предупредуваат дека споделувањето податоци за плаќање или пристап до корисничките сметки со ВИ-агенти може да доведе до откривање чувствителни информации. Постои ризик од неовластени купувања, промени во корисничките профили, па дури и трошење на собраните милји во програмата за лојалност MileagePlus.
Според United, ваквиот начин на резервирање може да биде и во спротивност со прописите на американското Министерство за транспорт и Федералната управа за воздухопловство. Како пример го посочуваат пријавувањето за лет, при што е потребно човек да потврди дека во багажот нема експлозивни материи.
Компанијата сака да ги избегне и проблемите што веќе се појавиле при користењето на ВИ-агенти. Меѓу нив е случајот со агентот Muse на Meta, кој објавил адреса на корисник на интернет.
Покрај безбедносните причини, United не сака ВИ-платформите да станат дополнителни посредници меѓу авиокомпанијата и патниците. Извршниот директор Скот Кирби, според „Волстрит џурнал“, изјавил дека компанијата не брза со воведувањето таканаречена агентска трговија.
„Искрено, не сакам да создавам уште еден посредник“, рекол Кирби во вторникот на еден настан.
Другите авиокомпании имаат поинаков пристап. Southwest, на пример, развила додаток преку кој корисниците можат директно да резервираат летови преку ChatGPT.
Сепак, интересот за купување и нарачување услуги преку ВИ-агенти засега е ограничен. Uber на претставувањето на деловните резултати за третото тримесечје соопштил дека во неделата на Ноќта на вештерките биле реализирани 320 милиони возења и испораки. Од нив, ВИ-агентите нарачале само 500 испораки преку Uber Eats и четири возења.
