Само неколку недели по смртта на музичката икона Доли Партон, нејзината помлада сестра Стела откри детали за последниот период од животот на пејачката и за нејзината одлука болеста да ја чува во тесен круг.
Доли Партон почина на 25 август, на 80-годишна возраст, по кратка борба со рак. Нејзиното семејство не откри за каков вид рак станувало збор, бидејќи пејачката сакала нејзината здравствена состојба да остане приватна. И не сите членови на поширокото семејство знаеле за нејзината болест.
Во разговор за емисијата „CBS Mornings“, Стела Партон раскажа дека Доли не им наредила да молчат за болеста, но никогаш не им дала дозвола да го откријат видот на ракот. Таа откри и дека нејзината сестра била подготвена да прифати и експериментален третман, дури и доколку тој повеќе не можел да ѝ помогне, со надеж дека искуството би можело да биде корисно за други пациенти во иднина.
Според Стела, Доли била помирена со крајот.
„Знаеше каде оди. Не одеше на лошо место. Одеше да биде со мама и тато“, раскажа таа.
Стела открила и дека последното нешто што Доли го побарала од неа било да се моли за неа.
Пејачката намерно ја чувала својата здравствена состојба подалеку од јавноста, бидејќи не сакала луѓето да се грижат за неа и не сакала околу себе да има негативност. Според Стела, токму затоа за болеста не знаеле ниту дел од поширокото семејство.
Минатата година сестрата Фрида Партон предизвика загриженост кај обожавателите откако на „Фејсбук“ ги замоли да се молат за здравјето на Доли, без да открие што точно се случува.
Стела изјавила дека смета оти Доли веројатно ѝ замерила на Фрида поради тоа.
„Не знам со сигурност, бидејќи не ја прашав Фрида. Тоа беше многу чувствителна тема. Не сакав да ги повредам чувствата на Фрида, а не сакав да зборувам ниту со Доли за тоа, но прилично сум сигурна дека Доли ѝ кажала малку да ја смири ситуацијата“, раскажа Стела.
Доли Партон почина околу година и пол по нејзиниот сопруг Карл Дин, кој почина во март 2025 година. Тие беа во брак речиси шест децении.
По смртта на сестра ѝ, Стела на „Инстаграм“ им се заблагодари на сите кои ѝ дале поддршка на семејството во периодот на жалост. Таа истовремено предупреди на бројните невистини и содржини создадени со вештачка интелигенција кои почнале да се шират по смртта на Доли.
Таа порача дека семејството, поради животот во јавноста, е изложено на голем притисок, но дека со текот на времето ќе се справи со загубата, бидејќи секој човек тагува на свој начин.
Стела истакна и дека Доли би била „воодушевена“ од количината љубов и поддршка што семејството ја добило по нејзината смрт.
