Многу возачи го исклучуваат старт-стоп системот во автомобилите, но истражување покажува дека неговото користење може значително да ја намали потрошувачката на гориво, особено во услови со чести застанувања.
Системот автоматски го исклучува моторот кога автомобилот ќе застане, на пример на семафор или во сообраќаен метеж, а повторно го активира кога возачот ќе продолжи со возењето.
Американското Друштво на автомобилски инженери (SAE) во 2023 година спровело истражување на четири возила, користејќи три стандардизирани тестови за мерење на потрошувачката. Кај возилата било споредувано возењето со вклучен и исклучен старт-стоп систем.
Во стандардниот градски FTP тест, потрошувачката била намалена за 7,27 отсто со користење на системот. Меѓутоа, во NYCC тестот, кој симулира услови со чести запирања и тргнувања, заштедата достигнала дури 26,4 отсто.
Ефектот бил значително помал при агресивно возење со чести и силни забрзувања.
Резултатите покажуваат дека старт-стоп системот има најголем ефект кога автомобилот често стои со вклучен мотор. Колку повеќе време се поминува во чекање на семафори и во колони, толку е поголем потенцијалот за заштеда на гориво.
На отворен пат, каде што има малку застанувања, придобивката од системот е многу помала.
