Фолксваген размислува за нов бран реструктурирање кој би можел да опфати укинување на до 100.000 работни места, затворање на повеќе фабрики во Германија и намалување на инвестициите, објави германскиот бизнис-портал „Менаџер Магазин“.
Според објавените информации, извршниот директор на компанијата, Оливер Блуме, планира да ги намали инвестициите за околу 15 проценти, на нешто повеќе од 130 милијарди евра во следните пет години.
Планот, исто така, предвидува постепено запирање на производството во фабриките во Хановер, Цвикау и Емден, како и во фабриката на „Ауди“ во Некарсулм, по повлекувањето на постојните модели од производната линија.
Доколку бидат усвоени, предложените мерки ќе одат подалеку од актуелната програма за намалување на бројот на вработени за 50.000 лица и би претставувале значително отстапување од договорот постигнат со синдикатите во 2024 година, со кој беше предвидено да нема затворање фабрики во Германија во текот на оваа деценија.
Од Фолксваген засега не ги коментираат информациите. Портпарол на компанијата одбил да зборува за, како што ги нарекол, „доверливите документи“, посочувајќи дека евентуалните одлуки ќе бидат разгледувани и одобрувани од управните тела на компанијата.
