Младиот мајмун од видот макак, по име Лука, безбедно се врати во паркот за диви животни Хајленд, во близина на Авимор во Шкотска, откако во текот на ноќта побегна од оградениот простор.
Потрагата по него траела во текот на целиот ден, а вработените користеле различни методи за да го пронајдат, меѓу кои и дрон.
„Лука се врати дома по сопствена желба и ни е драго што безбедно се врати во паркот“, изјави Дарен Мекгари од Кралското зоолошко друштво на Шкотска.
Тој додаде дека мајмунот сега ќе биде прегледан, по што чуварите и ветеринарите постепено ќе го вратат во неговата група.
Од паркот претходно ги предупредиле граѓаните да не се обидуваат да му се приближат доколку го забележат, иако животното не се смета за опасно. Наместо тоа, граѓаните биле повикани да пријават доколку го видат.
„Динамиката во групите примати може да биде многу сложена и не е невообичаено мажјаците да бидат принудени да ја напуштат групата“, објаснил Мекгари.
По целодневната потрага, Лука сепак решил сам да се врати во својот дом, на големо олеснување на вработените во паркот.
