Несекојдневна спасувачка акција се одвивала во неделата навечер на аеродромот во Ираклион на Крит, кога мршојадец слетал на крилото на авион подготвен за полетување и одбил да се помести.
Пилотот ја забележал птицата на крилото на авионот и ја известил контролната кула, објави грчкиот портал „Patris“.
Откако било утврдено дека мршојадецот нема намера да го напушти авионот, била повикана аеродромската противпожарна служба.
Пожарникарите со помош на специјални скали се приближиле до птицата и успеале безбедно да ја фатат.
Користејќи јакна и заштитни ракавици, пожарникарите го пренеле мршојадецот во просториите на противпожарната служба.
Потоа биле известени надлежните служби, а птицата била пренесена на безбедно место, каде што била ставена под надзор на стручни лица.
Акцијата завршила без последици за мршојадецот и патниците.
Според пишувањата на локалниот весник, птицата за време на спасувањето била исклучително мирна. Покриена со јакна, без никаков отпор седела во прегратките на еден од пожарникарите.
