Планирањето на празничните патувања низ Европа годинава може да донесе изненадување за посетителите на Германија, каде што повеќе традиционални божиќни пазари нема да се одржат поради финансиски тешкотии, недостиг од организатори, безбедносни услови и градежни работи. Дел од манифестациите ќе бидат организирани, но со скратена програма.
Меѓу откажаните е популарниот божиќен пазар во Кирхајм, во близина на Минхен. Локалните власти одлучиле да го укинат финансирањето поради намалените приходи од данокот на добивка од компаниите. Општината очекува годинава да собере околу 15 милиони евра, наместо планираните 22 милиони евра, поради што вовела ограничувања на одредени буџетски трошоци.
Божиќен пазар нема да има ниту во Гестахт, бидејќи општинската субвенција од 15.000 евра била одобрена дури кон крајот на септември, кога организаторите и излагачите веќе немале доволно време за подготовка.
Во Хаген-Хоенлимбург е откажан настанот во замокот Хоенлимбург поради недостиг од нов организатор, додека во Хановер нема да се одржи манифестацијата „Божиќ над покривите на Хановер“ поради организациски проблеми. Во Берлин е откажан фестивалот „Зимски сон“, бидејќи не била достапна планираната алтернативна локација во близина на главната железничка станица.
Зимскиот фестивал во хамбуршката населба Дулсберг е трајно укинат поради малиот број посетители и недоволните приходи. Во Винтерхаузен, пак, манифестацијата нема да се одржи поради градежни работи и неизвесноста околу сообраќајот.
Божиќен пазар нема да има ниту во историскиот комплекс Тримбург, бидејќи организаторите не успеале да обезбедат втор излез за евакуација, кој е задолжителен за настани од таков обем. Откажан е и адвентскиот настан во Танхаузен, откако сушата и нападот на поткорник уништиле меѓу 80 и 90 проценти од смреките во шумското подрачје каде што се одржувала манифестацијата, поради што дрвјата морале да бидат отстранети.
Некои градови сепак ќе ги задржат празничните настани, но со изменета програма. Во Ној-Улм средновековниот божиќен пазар ќе се одржи од 27 ноември до 20 декември, но без традиционалните претстави. Во Тафкирхен, пазарот „Флокенцаубер“ ќе биде организиран на 5 и 6 декември, но без големата снежна топка во која посетителите можат да влезат и без дел од сценската програма.
Дополнителен товар за организаторите се зголемените трошоци. Според национално истражување, расходите за организирање градски манифестации и божиќни пазари во Германија во последните три години се зголемиле во просек за 44 проценти. Трошоците за обезбедување сега сочинуваат приближно една четвртина од вкупниот буџет.