„Фолксваген“ започнува голема трансформација на својата понуда, која ќе донесе значително намалување на бројот на модели и нивните конфигурации до крајот на деценијата.
Според информациите на „Autocar“, германскиот производител планира до 2030 година да го намали бројот на модели за околу 50 проценти, а бројот на достапни верзии и пакети на опрема да го скрати за дури 75 проценти. Со тоа компанијата сака да ги намали трошоците, да ја подобри профитабилноста и да го направи производството поефикасно.
Во моментов не е познато кои модели ќе бидат повлечени од продажба. Од компанијата посочуваат дека во иднина ќе се насочат кон најисплатливите сегменти, а истовремено ќе се намали преклопувањето на моделите и брендовите во рамките на групацијата.
Покрај промените во понудата, „Фолксваген“ планира и намалување на производствениот капацитет – од сегашните околу 12 милиони на приближно девет милиони возила годишно. Целта е производството подобро да се усогласи со побарувачката на пазарот и да се зголеми ефикасноста.
Главниот извршен директор, Оливер Блуме, оцени дека автомобилската индустрија се наоѓа пред сериозни предизвици поради геополитичките тензии, високите трошоци, новите регулативи и засилената конкуренција, особено во сегментот на електричните автомобили.
Според него, компанијата ќе одговори на овие предизвици со поедноставување на производството, фокус на клучните технологии и поконцентрирана понуда на возила.
Иако засега не се открива кои модели ќе бидат укинати, јасно е дека „Фолксваген“ влегува во една од најголемите реорганизации на својата моделска гама во последните неколку децении. Повеќе детали за промените се очекуваат во наредниот период.
