Грчката планина Олимп е впишана на Листата на светско наследство на УНЕСКО, со што е препознаена како подрачје со исклучителна природна и културна вредност.
Одлуката беше едногласно усвоена на 48. седница на Комитетот за светско наследство, одржана во Бусан, Јужна Кореја. Со тоа, Олимп стана едно од ретките места во светот што има статус на мешано светско наследство, признато и поради своето културно и поради своето природно значење.
Во грчката митологија, Олимп се смета за дом на дванаесетте олимписки богови, а воедно претставува и едно од најбогатите подрачја со биолошка разновидност во Европа. На планината растат речиси 2.000 растителни таксони, меѓу кои и десетици видови што не постојат никаде на друго место во светот, како и ретки животински видови.
Со ова впишување, вкупниот број на локалитети во Грција што се наоѓаат на Листата на светско наследство на УНЕСКО се искачи на 21, од кои три имаат статус на мешано светско наследство. Грчките власти ја поздравија одлуката, оценувајќи ја како значајно меѓународно признание што ќе придонесе за зајакнување на напорите за заштита на природното богатство и за поголема меѓународна промоција на еден од најпрепознатливите пејзажи во земјата.
