Ресторанот „Македонски мерак“ во Загреб, отворен во 2022 година во просторот на поранешната пивница „Златни медо“, беше посетен од хрватски ресторански критичари кои го пробаа дел од понудата и ги споделија своите впечатоци.
Ресторанот се наоѓа на улицата Савска 56, а една од неговите предности е паркингот со повеќе од 200 места. Иако паркирањето вообичаено се наплаќа, гостите на ресторанот не плаќаат, туку треба да ја заверат паркинг-картата кај келнер.
Критичарите го посетиле ресторанот во работен ден околу 13:30 часот. Во тој период немало голема гужва, но забележале дека повеќе гости доаѓале по храна за носење. Просторот е голем и уреден во рустикален стил, со голема тераса и доволно место за поголеми друштва.
Во понудата има пет главни македонски јадења. Меѓу нив е гравчето тавче, кое чини 7 евра, додека варијантата со плескавица е 12 евра. Турли тавата чини 19 евра, а се нудат и вардарско ѓрне со печен компир за 19 евра, телешки чомлек за 21 евро и пилешко во сос со шампињони, сирење и печен компир за 18 евра.
Критичарите забележуваат дека изборот на македонски јадења е релативно мал во однос на тоа што ресторанот се претставува како место за македонска кујна. Од друга страна, менито е многу пошироко кога станува збор за скара и класични јадења.
Од предјадењата се нудат полнета пиперка со сирење, македонски мазалици, полнета похована палачинка, пилешки стапчиња и различни плати. Во понудата има и четири видови супи, како и бројни јадења од скара, јадења по нарачка, салати, прилози и десерти.
Критичарите го пробале гравчето тавче со плескавица, мешана салата и леб, како и турли тава и дополнителни лепињи. Гравчето тавче го оцениле како многу добра порција, со изразен и ароматичен вкус.
Плескавицата, според нив, не оставила толку силен впечаток, иако не била лоша. Позитивно го издвоиле количеството кромид со кое била послужена. Лепињата, пак, ја оцениле како топла, мека и доволно сочна.
Најдобар впечаток им оставила турли тавата. Станува збор за комбинација од свинско и говедско месо, печен зеленчук и компири, подготвени заедно во рерна.
„Турли тавата е токму она јадење поради кое би се вратиле во ‘Македонски мерак’“, е заклучокот на критичарите, кои особено го пофалиле начинот на кој месото и зеленчукот се поврзуваат во едно јадење.
Како забелешка го издвоиле само компирот послужен како прилог, кој им бил донесен прилично млак.
Како главни предности на ресторанот тие ги издвојуваат големиот и пријатен простор, терасата, бесплатниот паркинг за гостите и широката понуда.
Сепак, според нив, доколку некој доаѓа првенствено поради македонската кујна, изборот е нешто потесен. Тие сметаат дека би било интересно на менито да има уште традиционални македонски јадења, особено оние што поретко можат да се најдат во загрепските ресторани.
