Јапонската корпорација KDDI претстави мобилен телефон со основни функции, наменет за луѓето кои сакаат привремено да се оддалечат од интернетот и прекумерното користење паметни телефони.
Од компанијата соопштија дека новиот телефон ќе започне да се продава следниот месец, пренесува порталот „NHK World“.
Новиот модел е дизајниран според изгледот на мобилните телефони кои беа популарни на почетокот на 21 век. Корисниците нема да можат да преземаат апликации ниту да пристапуваат на интернет.
„Компанијата се насочува кон луѓето кои сакаат привремено да бидат офлајн, бидејќи во денешното информатичко општество сè повеќе време поминуваат користејќи паметни телефони“, соопшти KDDI.
Се очекува новиот модел да привлече љубители на ретро-уредите и аналогната култура.
Сунахара Сатоши, менаџер во компанијата KDDI, изјави дека се надеваат оти новиот телефон ќе им помогне на луѓето кои вообичаено поминуваат премногу време гледајќи во екраните.
Слични мобилни телефони со минимални функции претходно претставија и производители од САД и Швајцарија.