Лангош е еден од најпознатите унгарски специјалитети. Златно пржено тесто, крцкаво однадвор, а меко одвнатре, најчесто се служи со лук, кисела павлака и сирење.
Ако сакате да ја подготвите класичната верзија на ова популарно јадење, следете го едноставниот рецепт подолу.
Состојки:
500 грама брашно
25 грама свеж квасец или 7 грама сув квасец
една лажичка шеќер
една лажичка сол
300 милилитри млака вода
100 милилитри млеко
масло
Подготовка:
Во млако млеко додадете шеќер и квасец, па оставете десетина минути да се активира. Во поголем сад измешајте брашно и сол, потоа додадете вода, масло и подготвениот квасец.
Замесете тесто, покријте го со кујнска крпа и оставете го да нарасне на топло место околу еден час, односно додека не го удвои волуменот.
Тестото префрлете го на набрашнета работна површина и поделете го на осум до десет еднакви делови.
Секој дел со раце развлечете го во тенок круг, при што рабовите можат да останат малку подебели.
Во длабока тава загрејте доволно масло за пржење.
Пржете ги лангошите еден по еден неколку минути од секоја страна, додека не добијат златно-кафеава боја.
Извадете ги на хартија за да се отстрани вишокот маснотија.
Послужете ги веднаш со кисела павлака, рендано сирење и лук, а по желба можете да додадете и сувомеснати производи како кулен, сушено месо или суџук.
