Мал по димензии, лесен за носење и со сите стандардни копчиња – Microsoft го претстави Xbox Nano Controller, најмалиот контролер што компанијата досега го направила. Новиот уред е наменет за деца, гејмери со помали дланки и за сите што сакаат да играат видеоигри и кога се надвор од својот дом.
Контролерот е долг нешто повеќе од 12 сантиметри и тежи околу 99 грама, што го прави полесен од многу мобилни телефони и доволно мал за да се носи во џеб. И покрај компактните димензии, Microsoft не се откажал од ниту една стандардна контрола. Уредот ги има сите 18 вообичаени влезови, со распоред на копчињата што одговара на оној на стандардниот Xbox контролер.
Xbox Nano има батерија што се полни, но компанијата засега не открива колку време ќе трае едно полнење. Вклучено е и програмабилно акциско копче, кое корисниците можат да го приспособат за правење снимки од екранот, снимање на играњето или активирање често користени кратенки.
Поврзувањето е овозможено преку Xbox Wireless и Bluetooth, па контролерот може да се користи со сите компатибилни уреди. Од Xbox го претставуваат и како практично решение за целото семејство.
Преднарачките за Xbox Nano Controller веќе се достапни по цена од 50 долари. Испораката треба да започне во ноември во 36 земји, меѓу кои САД, Велика Британија, Канада, Јапонија и Австралија. Подоцна се очекува производот да биде достапен и на дополнителни пазари, а цените ќе се разликуваат зависно од земјата.
