Киселиот карфиол е одличен додаток за зимските ручеци, а освен што е вкусен и крцкав, лесно се подготвува и може да се чува како домашна зимница.
Карфиолот може да се подготвува на различни начини – варен, печен, во супи или салати, но за време на сезоната на зимница многумина го избираат токму киселиот карфиол.
Карфиолот е богат со хранливи материи
Карфиолот е нискокалоричен зеленчук. Во 100 грама има околу 25 калории и приближно пет грама јаглехидрати, а содржи и растителни влакна, протеини, витамин Ц и витамини од Б-комплексот.
Од минералите, карфиолот содржи калиум, фосфор и селен, како и различни растителни соединенија со антиоксидативни својства.
Затоа, карфиолот е добар избор како дел од разновидна исхрана, особено во периодот кога почесто се подготвува зимница.
Состојки:
1 голема главица карфиол од околу 2 килограми или 2 помали
300 мл оцет
3 литри вода
10 лажици шеќер
3 лажици сол
1 кесичка винобран
Подготовка:
Најпрво добро измијте го карфиолот и поделете го на помали цветови. Ставете ги во ладна вода и оставете ги да отстојат околу 10 минути, а потоа исцедете ги.
За пресолот, во поголемо тенџере ставете 3 литри вода, оцет, шеќер и сол. Ставете ја смесата на шпорет и кога ќе зоврие, тргнете ја од оган и оставете ја да се излади.
Во меѓувреме, во друго тенџере ставете вода со малку сол и оставете да зоврие. Додајте ги цветовите карфиол и бланширајте ги околу три минути. Целта е карфиолот малку да омекне, но да ја задржи цврстината.
Потоа извадете го карфиолот од врелата вода и веднаш префрлете го во ладна вода. Оставете го една до две минути, а потоа добро исцедете го.
Распоредете ги цветовите карфиол во претходно стерилизирани тегли, без да ги натискате премногу.
Во изладениот пресол додајте една кесичка винобран, односно околу 5 грама, и добро промешајте.
Со подготвената течност наполнете ги теглите така што карфиолот целосно да биде покриен. Добро затворете ги теглите и складирајте ги на соодветно место за чување зимница.
Така подготвениот кисел карфиол може да биде одличен додаток со печено месо, грав и други зимски јадења.
