Физичката активност може да има значајна улога во зачувувањето на здравјето на мозокот и намалувањето на ризикот од деменција кај жените, особено во периодот на менопауза. Иако генетиката влијае врз појавата на Алцхајмеровата болест, научниците сè повеќе укажуваат дека секојдневните навики имаат големо значење за когнитивното здравје.
Жените сочинуваат околу две третини од лицата кај кои е дијагностицирана Алцхајмерова болест, а многу од нив во текот на менопаузата се соочуваат со таканаречена „ментална магла“, односно тешкотии со помнењето, концентрацијата и обработката на информациите.
Неврологот д-р Ронда Воскул од Универзитетот Калифорнија во Лос Анџелес (UCLA), во емисијата „Next Question with Katie Couric“, објаснила дека намалувањето на нивото на естроген во менопаузата може да влијае врз одредени мозочни функции. Овој хормон има важна улога во здравјето на мозокот, срцето, коските и кожата, а неговиот пад може да предизвика промени во работната и вербалната меморија, брзината на размислување и текот на мислите.
Според Воскул, хормонската терапија што вообичаено се користи за ублажување на симптомите на менопаузата не мора да ги реши и когнитивните проблеми. Различните делови од мозокот имаат различни потреби, поради што се потребни дополнителни истражувања и развој на терапии што би биле насочени кон зачувување на мозочните функции.
Како една од најважните навики за заштита на мозокот, неврологот ја издвојува редовната физичка активност. Таа посочува дека вежбањето може да придонесе за намалување на ризикот од Алцхајмерова и васкуларна деменција, како и од нивната комбинирана форма.
Вежбањето го подобрува кардиоваскуларното здравје, ја поттикнува циркулацијата и го намалува ризикот од затнување на крвните садови, со што се обезбедува подобар доток на крв до мозокот. Дополнително, за време на физичката активност мозокот и мускулите создаваат протеин наречен BDNF, кој има заштитна улога и ги поддржува нервните клетки.
Воскул препорачува комбинација од кардиовежби и вежби за сила. Нејзиниот совет е трипати неделно да се практикуваат по 30 минути активности како брзо одење, трчање, пливање или возење велосипед, а дополнително време да се посвети на кревање тегови, што придонесува и за здравјето на коските.
Покрај физичката активност, важни се и менталните предизвици, како учење нови вештини, како и правилната исхрана. Неврологот ја препорачува медитеранската исхрана и режимот MIND, кој ги комбинира принципите на медитеранската и DASH-исхраната, со акцент на намалување на заситените масти и внесување храна богата со антиоксиданси и растителни влакна.
Таа советува промените да се воведуваат постепено – со почести прошетки, нови физички активности, учење и поздрави навики во исхраната.
