Ирската нискобуџетна авиокомпанија „Рајанер“ во април следната година целосно ќе го напушти аеродромот во Бремен, поради што аеродромот годишно ќе остане без околу 400.000 патници.
Според податоците на германската сојузна покраина Бремен, аеродромот поради повлекувањето ќе губи околу три милиони евра приходи годишно, пренесува „Билд“.
„Рајанер“ јавно не ја навела конкретната причина за повлекувањето, но пополнетоста на нејзините летови од Бремен била над 90 отсто, што покажува дека побарувачката не била проблем.
Авиокомпанијата со седиште во Даблин веќе со месеци ги критикува високите трошоци за работење на германските аеродроми, вклучително и даноците, безбедносните и аеродромските такси.
Преговорите за продолжување на работењето во Бремен пропаднале поради условите под кои „Рајанер“ би го користел аеродромот. Германските власти тврдат дека компанијата барала значително намалување на аеродромските такси.
Според државниот секретар Кај Штуренберг, барањата биле толку големи што аеродромот во Бремен би морал да го субвенционира секој патнички лет на „Рајанер“ со пет евра по патник.
„Рајанер“ веќе ги напушти аеродромите во Дортмунд, Дрезден и Лајпциг, додека во Хамбург значително го намали бројот на летови. Компанијата на крајот на октомври ќе ја затвори и својата база во Берлин.
