Лебот може да биде дел од урамнотежената исхрана и во повозрасна доба, но не сите видови имаат иста хранлива вредност. Три нутриционистки за „Хелт“ издвојуваат еден вид леб како особено добар избор за здраво стареење, благодарение на влакната, протеините и другите важни хранливи материи што ги содржи.
Станува збор за леб од никнати цели зрна, кој се подготвува од цели зрна што почнале да ’ртат пред преработката. Овој процес може да го олесни варењето и да ја подобри искористливоста на одредени хранливи материи.
„Лебот од никнати цели зрна се издвојува како добар избор за здраво стареење бидејќи ’ртењето ја подобрува достапноста на хранливите материи“, објаснува нутриционистката Алиса Симпсон.
Нутриционистката Лиса Ендрус посочува дека лебот од никнати зрна може да се подготвува и со мешунки, со што се зголемува неговата содржина на протеини. Ваквите комбинации можат да ги обезбедат сите девет есенцијални аминокиселини што му се потребни на организмот.
Протеините се особено важни во повозрасна доба бидејќи помагаат во зачувувањето на мускулната маса, додека растителните влакна придонесуваат за добро варење.
Нутриционистката Кејти Хедли објаснува дека лебот од никнати цели зрна обично содржи повеќе влакна и протеини од лебот направен од рафинирано брашно. Овие хранливи материи придонесуваат за подолго чувство на ситост и за регулирање на шеќерот во крвта.
Како уште еден добар избор, нутриционистките го издвојуваат лебот од цели зрна подготвен со природна ферментација, односно лебот со природен квасец.
„Ферментацијата може да ја подобри подносливоста на лебот“, вели Симпсон. Хедли додава дека живите бактерии не преживуваат при печењето, но самиот процес на ферментација сепак може да го олесни варењето кај некои луѓе.
При изборот на леб, нутриционистките препорачуваат производи од цели зрна, богати со влакна и протеини, со што е можно помала количина додаден шеќер.
