Повеќе од половина тинејџери во Јапонија користат генеративна вештачка интелигенција за барање совети за лични проблеми и дилеми, покажува истражување на јапонската влада.
Според истражувањето кое ги опфатило корисниците на вештачка интелигенција, спроведено од панел на потрошувачи при владата на Јапонија, 52,4% од тинејџерите потврдиле дека се консултираат со вештачката интелигенција за своите дилеми и грижи, што е највисок удел меѓу сите старосни и полови групи, пренесува дневникот „Japan Today“.
Повеќе од 30% од жените на возраст од 20 до 40 години користат вештачка интелигенција за истата цел, додека помалку од 30% од мажите тоа го прават во сите возрасни групи.
Онлајн анкетата била спроведена во февруари меѓу корисници на генеративна вештачка интелигенција, од тинејџерска возраст до 70 години и постари, а биле анкетирани вкупно 1.442 лица, по 103 мажи и 103 жени во секоја возрасна група.
Истражувањето исто така покажало дека 38,6% од испитаниците рекле дека во голема мера или делумно им веруваат на советите на вештачката интелигенција за лични односи и социјални интеракции.
Таквиот тренд бил најзабележлив кај помладите корисници од двата пола, при што таа бројка изнесувала 63,1% меѓу тинејџерите, наведува јапонскиот дневник.
