Кој е највалканиот предмет што го користите? Може да има десет пати повеќе бактерии отколку на даската на тоалетната школка
Предметот што го допираме стотици пати во текот на денот, а ретко помислуваме да го исчистиме, може да биде меѓу најзагадените површини што ги користиме – мобилниот телефон.
Според податоците на Институтот за здравствена политика и иновации при Универзитетот во Мичиген, на мобилниот телефон може да има дури десет пати повеќе бактерии отколку на даската на тоалетната школка.
Катлин Манган, раководителка на лабораторија во компанијата „Гилсон Сајенс“, објаснува дека телефоните ги носиме речиси насекаде, вклучително и во тоалет, ги допираме илјадници пати дневно, а притоа ретко ги чистиме.
На нивната површина можат да се задржат стафилококи и стрептококи, но и бактерии поврзани со фекално загадување, како ешерихија коли и фекални ентерококи. Некои од нив можат да предизвикаат инфекции на кожата, воспаление на грлото и дигестивни тегоби, вклучително и мачнина, повраќање и дијареја. Сепак, самото присуство на бактерии не значи дека неизбежно ќе дојде до инфекција.
Количеството микроорганизми на одредена површина зависи и од тоа колку често се допира и колку редовно се чисти. Така, ракофат во јавен превоз што секојдневно се дезинфицира може да има помалку микроорганизми од мобилен телефон што речиси никогаш не се чисти.
За да се намали ризикот, се препорачува телефонот да не се користи во тоалет и да не се остава на потенцијално загадени површини. Добро е да се избегнува и неговото директно прислонување до образот и устата, а уредот редовно да се чисти со средства безбедни за него, според упатствата на производителот.
Една од најважните мерки, сепак, е едноставна – редовно и темелно миење на рацете, со што се намалува пренесувањето на микроорганизмите од рацете на предметите и нивното внесување во организмот.