Една емотивна и несекојдневна случка ги одбележа средбата на фудбалските ветерани на Пелистер од Битола, Тетекс од Тетово и Борец од Велес, која вчера се одржа во градот под Пелистер.
Во моментите кога присутните ја пееле легендарната песна „Мајка“, која ја изведува Спасен Сиљаноски, дошле на идеја да му се јават преку видеоповик и да го поканат да им се придружи.
Спасен во тој момент бил во својот дом во Скопје, но повикот не го оставил рамнодушен. Без многу размислување, се качил во автомобилот и тргнал кон Битола.
За помалку од два часа пристигнал во градот, каде што бил пречекан со големо воодушевување од присутните ветерани и гости.
Средбата добила уште поемотивна нота кога Спасен застанал пред нив и во живо ја запеал својата позната песна „Мајка“. Заедно со него, присутните ги пееле добро познатите стихови „И плачев и пеев“, создавајќи момент исполнет со емоции, радост и заедништво.
Видеото од неговото доаѓање и настапот предизвика воодушевување, а присутните не ги криеја пофалбите за неговиот гест.
„Каков човек, каков Македонец!“, стои во описот на видеото.