Вештачката интелигенција сè повеќе навлегува во автомобилската индустрија и го забрзува процесот на дизајнирање нови модели, но истовремено отвора прашања за иднината на работните места. Компании како „Фолксваген“, „Џенерал моторс“ и „Форд“ веќе користат вакви алатки, а експертите предупредуваат дека на дизајнерските студија во иднина можеби ќе им бидат потребни помалку вработени.
Карл Нојхолд, раководител за надворешен дизајн во „Шкода“, во интервју за Autoweek.nl призна дека напредокот на генеративната вештачка интелигенција го изненадил. Според него, денес едноставна скица за неколку секунди може да се претвори во детален дигитален приказ со реалистични сенки, рефлексии и опкружување.
Нојхолд веќе активно користи алатки со вештачка интелигенција и смета дека тие ќе имаат сè поголема улога во автомобилскиот дизајн. Работата повеќе не се сведува само на цртање, туку бара и познавање современи дигитални алатки што овозможуваат побрзо развивање и претставување идеи.
Сепак, поголемата продуктивност може да има последици врз вработувањето. Доколку дизајнерите со помош на вештачката интелигенција можат да завршат повеќе задачи за пократко време, компаниите би можеле да имаат потреба од помал број вработени. Тоа особено би можело да им го отежне влезот во индустријата на младите дизајнери.
И покрај технолошките промени, Нојхолд смета дека рачните скици и понатаму имаат важна улога. Тој ги советува младите кандидати при конкурирање за работа да приложуваат и цртежи изработени со рака, бидејќи тие можат подобро да ја покажат нивната креативност и способноста самостојно да развиваат идеи.
На можните промени претходно предупреди и поранешниот директор за дизајн на „Мерцедес“, Горден Вагнер, кој оцени дека вештачката интелигенција во следната деценија би можела значително да ја промени улогата на автомобилските дизајнери.
Автомобилските производители веќе ја применуваат технологијата на различни начини. „Џенерал моторс“ ги претвора рачните скици во детални тридимензионални прикази и користи виртуелни алатки за анализа на аеродинамиката. „Форд“, пак, применил вештачка интелигенција за додавање бои на црно-бели фотографии од прототипови од шеесеттите години.
Иако вештачката интелигенција станува сè поважна алатка во автомобилскиот дизајн, останува отворено прашањето колку ќе влијае врз бројот на работни места и начинот на кој ќе се создаваат идните модели.
